Братот на Михаел Шумахер стапи во брак со 14 години помлад партнер, две години откако сподели дека е геј

Ралф Шумахер се заколна на вечна љубов две години откако сподели дека е хомосексуалец.

Братот на поранешниот возач во Формула 1 Михаел Шумахер стапи во брак со својот партнер Етјен Буске-Касањ на гламурозна церемонија во Сен Тропе.

50-годишниот Германец и неговиот 14 години помлад избраник го изговорија судбоносното „да“ пред семејството и пријателите, а прославата траела три дена. Двајцата младоженци се појавиле во усогласени темносини костуми со бели кошули и сини вратоврски.

Непосредно пред свадбата, Етјен се подложил на естетска интервенција на лицето. Иако Ралф во документарната серија посветена на нивната љубовна приказна признал дека не бил воодушевен од идејата, неговиот партнер сепак решил да го направи зафатот, бидејќи долго време не бил задоволен од својот изглед.

Свадбената церемонија била снимена како дел од документарната серија „Ralf & Etienne: We Say Yes“, која го следи животот на парот и подготовките за нивната венчавка.

Веста за истополовата врска на Ралф се рашири речиси една деценија по неговиот развод со поранешната сопруга Кора Бринкман во 2015 година.

Тие се венчаа во 2001 година, само неколку месеци пред раѓањето на нивниот син Давид.

Меѓу гостите на свадбата бил и неговиот син кој од самиот почеток јавно му даде поддршка.

„Многу сум среќен што конечно пронајде некој со кого навистина се чувствуваш удобно и сигурно. Не е важно дали станува збор за маж или жена. Сто проценти сум покрај тебе, тато, и ти посакувам сè најдобро! Честитки!“ – напиша тој.