Неповолните временски услови во Македонија ни попречија синоќа да ја погледнеме со свои очи или низ телескоп „Божиќната ѕвезда“, феномен каков што немало со векови.
Јупитер и Сатурн, најголемите планети во нашиот соларен систем, беа најблиску една до друга во изминатите 400 години. Настанот се нарекува „големата конјункција“.
Фотографии од целиот свет го покажуваат реткото „рандеву“ на Сатурн и Јупитер, а на дел од нив направени со помош на телескоп се гледаат и месечините на Јупитер и прстенот на Сатурн.
Последен пат Сатурн и Јупитер биле толку блиску во 1623 година, но тогаш нивниот близок небесен танц не бил вака видлив. Претходно, „спојувањето“ на двете планети било толку добро видливо во далечната 1226 година.
Постои верување дека ова е истиот астролошки феномен опишан во Библијата, кога тројцата мудреци ја следеле „ѕвездата над Витлеем“ за да стигнат до Исус на неговото раѓање.
