„Биди причината што нечие срце продолжува да чука“: Каролина Гочева со силна порака за органодарителството

Каролина Гочева го искористи својот глас за да испрати порака која може да поттикне на размислување, да ја подигне свеста, а можеби и да спаси нечиј живот.

Македонската пејачка сними видео посветено на органодарителството, во кое зборува за луѓето кои живеат со надеж дека навреме ќе го добијат повикот којшто за нив значи нова шанса за живот.

„Македонското девојче“ потсетува и на огромната моќ што ја носи една одлука: еден донатор може да спаси до осум човечки животи.

Еве ја нејзината порака во целост:

Статистиката вели, на секои 9 минути ново име се запишува на листата на чекање за дарување на орган. Во секој момент, повеќе од 100.000 луѓе ја чекаат својата нова шанса за живот, но за жал, ногу од нив и не успеваат да ја дочекаат.

Го имаме и фактот дека еден донатор може да спаси до 8 животи, што би требало многу да ја олесни и охрабри одлуката за донирање, затоа што донирањето на орган е пред сè еден несебичен чин, а одлуката да спасите нечиј живот едноставно ве прави бесмртни.

Со изборот да донирате, вашата приказна не завршува со вас, туку продолжува да живее низ некој друг. А кога веќе ќе нè нема, не можеме со нас да ги понесеме отчукувањата на срцето, но можеме да ги оставиме да донесат радост и љубов во нечиј друг живот.

Затоа, биди причината што нечие срце продолжува да чука. Биди чудото за кое толку многу семејства сонуваат. Биди херој, спаси живот!