Backstreet Boys ја прославија својата 20-годишнина со откривањето на нивната ѕвезда на Холивудската патека на славните.
Момците заедно со своите семејства и бројните фанови присуствуваа на церемонијата на познатата улица во Холивуд, каде им беше посветена 2.485-тата ѕвезда.
„Ве сакам момци. Покрај мојот свадбен ден и раѓањето на мојата ќерка, ова е без дискусија најубавиот ден во мојот живот“ – изјавил Еј Џеј.
„Никогаш не си ни замислував дека ќе бидам дел од ова“ – изјавил Ник, борејќи се да не пушти солза.
„Цел живот работев за никој да не гази врз мене, но не ми смета ова“ – се пошегувал Брајан.
Backstreet Boys официјално се обединија минатата година. Летово се очекува нивниот нов албум, а наредната година планирано е да излезе музички документарен филм за нивната кариера.
Со над 130 милиони продадени копии од седумте албуми, Backstreet Boys се најуспешниот машки бенд досега, а воедно и едни од најуспешните музички изведувачи. Светот ги запозна пред точно 20 години. Во нивните најголеми хитови се вбројуваат „Quit Playing Games (With My Heart)“, „Shape of My Heart“, „I Want It That Way“ и „Show Me the Meaning of Being Lonely“.