Авантурист од Данска го прошета цел свет без да се качи во авион, ја посети и Македонија и сподели впечатоци
Запознајте го Тор Педерсен – првиот човек кој го прошета цел свет без да се качи во авион. 44-годишниот Данец го започна своето патување пред 10 години и неодамна ја посети последната земја на неговата листа.
Неговиот амбициозен проект тој го нарече „Once Upon a Saga“. Со посетата на Малдиви, заврши неговата авантура која траела 3.512 дена.
Тор минувал најмалку по 24 часа во една држава, а патувал со автомобил, автобус, воз и брод – вклучувајќи и 37 контејнерски бродови.
„Горд сум што никогаш не се откажав во целото ова патување. Се гордеам што можев да ја покажам силата која беше потребна“ – изјавил тој.
Ковид-пандемијата ги одложи неговите патувања две години. Тој останал заглавен во Хонгконг, а само што се отвориле гранциите, заминал за Австралија.
За време на паузирањето од авантурите, Тор се ожени со својата долгогодишна девојка.
Педерсон е многу среќен што во секоја земја наишол на љубезност и поддршка од граѓаните.
„Не можам да се сетам на земја во која не добив љубезност и поддршка од луѓето. Сега, кога ќе гледам мапа или кога ќе вртам глобус, ќе гледам во нив и ќе мислам: ‘има некоја личност добра и љубезна во секоја од овие земји и јас имав среќа да наидам на нив – какви се шансите за тоа?’“ – вели упорниот Данец.
Педерсон ја посети и Македонија. На неговиот блог, тој ги објави своите впечатоци за нашата земја.
Македонија е мала балканска земја преполна со планини, езера, грозје и околу 2 милиони луѓе. Тоа е прекрасна земја со богата историја и култура.
Македонија е пријателска и мирна земја со температури кои достигнуваат до 45 степени налето и може да има температури до -30 степени во зима. Македонија е членка на Обединетите нации и полека оди во правец да стане и членка на Европската Унија.
Според мештаните, Скопје е град кој претрпе многу промени во изминатите 10 години. Многу реновирање и модернизација. Се појавија многу статуи во знак на сеќавање на револуционерните херои и важни историски личности. Слушнав многу Американци како велат дека ‘Скопје е прекрасен град и дека ги потсетува на Скандинавија’. Не знам каква сличност нашле со Скандинавија, но дефинитивно ќе се согласам дека Скопје е убав град. Во него живеат околу 500.000 луѓе и не би ме чудело ако сите се пријателски расположени. Градот е голем и опкружен со планини. Низ него тече реката Вардар, има многу зелени површини, многу ресторани и кафулиња, интересна архитектура и сето тоа се вклопи со мојот многу ограничен буџет.
Македонија е добро позната по свежите производи, како што се грозјето и портокалите. Има еден ски-центар што умирам да го пробам некој ден! Најстарото езеро во Европа се наоѓа во Македонија. Јазикот е словенски и не е ни приближно стар како албанскиот или грчкиот, но тежок ми е за изговор.
Македонија е секако доволно убава за да се најде на мојата листа. Ќе се вратам некој ден под различни услови и со нетрпение ќе чекам да ја истражам Македонија малку повеќе. Се гледаме тогаш.
