Анџелина Џоли со насолзени очи одржа говор за жртвите на семејно насилство, доби поддршка од ќерката Захара
Анџелина Џоли со насолзени очи и огромни емоции зборуваше пред Сенатот, а покрај себе имаше силна поддршка – ќерката Захара.
46-годишната оскаровка пристигна во Капитол Хил со 17-годишната девојка за да ја изрази својата поддршка за жртвите на семејно насилство и да го убеди Сенатот да го обнови Законот за спречување на насилството врз жените, кој им овозможува основна заштита на жртвите.
„Причината што на многу луѓе им е тешко да излезат од ситуација на насилство е тоа што некој прави да се чувствуваат безвредно. Кога има молчење од Конгрес, кој една деценија е премногу зафатен да го обнови Законот за спречување на насилството врз жените, се засилува тоа чувство на безвредност. Помислувате: ‘Можеби насилникот е во право. Можеби не вредам толку многу.’ Поради ова, изгласувањето на овој закон е еден од најважните гласови кои сенаторите на САД треба да ги дадат оваа година“ – рече Џоли, обидувајќи се да не дозволи емоциите да ја надвладеат.
„Како што знаат оние кои преживеале насилство, на жртвите во нашиот пропаднат систем не им е дозволено да се гневни. Треба да се смирени и трпеливи... Но, обидете се да останете смирени кога чувствувате како некој да ви ја држи главата под вода и се давите. Обидете се да останете смирени кога гледате дека е повредуван некој што го сакате...“
„Најмногу сакам да укажам на децата кои се преплашени и страдаат во овој момент и за многуте луѓе за кои овој закон доаѓа предоцна. За жените кои страдаа низ овој систем со мала или без никаква поддршка и сè уште ја носат болката и траумата од насилството. За младите лица кои преживеале насилство и излегле посилни... И за жените и децата кои умреа, но можеа да бидат спасени“ – додаде таа.
Славната актерка сподели фотографија на која позира со ќерката Захара и напиша:
„Мило ми е што го споделувам ова со Захара и за нејзиното присуство кое ми ги смирува нервите пред денешната прес-конференција“.
