„Ако умираме, ќе умираме заедно“: Сопругата на Србинот кој ќе излеташе од авион над Македонија откри како му го спаси животот

Сопругата на 61-годишниот српски државјанин, кој за малку ќе беше исфрлен од авионот над Македонија поради декомпресија, ја раскажа потресната приказна за моментите кога се борела да му го спаси животот. Тој се здоби со сериозни повреди и не е во состојба да зборува, но за среќа, остана жив.

Светлана Грковиќ со сопругот Љубиша Каровиќ се враќале дома од летување со летот на Ryanair од Солун кон Меминген кога околу половина час по полетувањето настанал инцидентот.

Како да се откина дел од моторот и удри во прозорецот до кој седеше мојот сопруг Љубиша. За среќа, беше врзан. Кога се скрши прозорецот, дојде до декомпресија во кабината. Притисокот го повлече Љубиша и половина од телото му висеше од авионот. Веднаш реагирав и го фатив за нозете. Си помислив: „Ако умираме, ќе умираме заедно“. Беше ужасно – изјави Светлана за српскиот портал Nova.rs.

Таа раскажа дека во авионот настанал хаос, се активирале кислородните маски, а патниците биле преплашени. Дел од нив веднаш ѝ помогнале.

На помош ми дојдоа некои луѓе, се сеќавам на еден маж и една жена. Тој човек многу ми помогна, мене и на Љубиша. Заедно ги држевме нозете на Љубиша додека авионот се враќаше кон Солун. Мислам дека човекот беше Албанец, му благодарам до небото. Не му го запомнив името, но би сакала да го запознаам и уште еднаш лично да му се заблагодарам – рече таа.

Светлана сподели дека Љубиша неколкупати ја губел свеста, а во кабината владеела паника.

По принудното слетување во Солун, Љубиша веднаш бил пренесен во болница. Тој се здобил со сериозни повреди на раката, изгореници и силен шок.

Најважно ми е што е жив. Тешко е повреден и е во шок. Најтешко му е повредена раката, а има и изгореници. Не е во состојба да комуницира и не се сеќава на целиот настан – изјави Светлана.

BREAKING: Ryanair passenger reportedly saved from being sucked out the cabin after window fails during a flight from Thessaloniki to Memmingen.

According to local media Ryanair flight FR1879, a Boeing 737-8AS, returned safely to Greece on Friday after part of a damaged engine… pic.twitter.com/YPgRodjPFp

— Breaking Aviation News & Videos (@aviationbrk) July 10, 2026

Од Ryanair потврдија дека за време на летот дошло до оштетување на прозорецот во патничката кабина, по што авионот безбедно се вратил во Солун. Компанијата соопшти дека еден патник добил медицинска помош, а останатите патници биле префрлени со друг авион до нивната крајна дестинација.

Причините за сериозниот инцидент сè уште се испитуваат, а истрагата треба да утврди што точно довело до оштетувањето на авионот.