12-годишниот Виктор од Србија хекла по една плетка за секој нов следбеник, за 2 недели стана интернет сензација
Виктор Митиќ од Јагодина стана вистинска интернет сензација откако започна уникатен предизвик – да исплете по една плетка за секој нов следбеник на својот профил на Инстаграм.
Првиот ден започна симболично, без ниту една плетка, бидејќи немаше следбеници. Веќе вториот ден, бројката порасна на 13, а третиот ден неговото видео стана вирално и му донесе огромна популарност. Само за 12 дена, Виктор собра над 400.000 следбеници и доби шанса да го оствари својот сон – да го изработи најголемиот хеклан килим во Србија.
На 13-тиот ден од предизвикот, 12-годишното момче веќе има изработено околу 68.000 плетки и секојдневно ги информира своите следбеници за напредокот, искрено заблагодарувајќи се за поддршката. „Има уште многу работа“, вели тој.
Љубовта кон хеклањето ја наследил од својата баба, а дополнително се усовршувал преку видеа на YouTube. За неговата ненадејна популарност вели дека реакциите од врсниците се поделени, некои го поддржуваат, додека други го исмеваат, но тој не планира да се откаже.
Виктор најавува дека во иднина ќе споделува и туторијали за хеклање, со цел да ги инспирира и другите да научат нешто ново и да го засакаат неговото омилено хоби.
Во интервју за „Хајп“, младиот феномен истакнува дека славата не го променила и дека останал истото скромно и воспитано момче. Неговите соништа се големи, кога ќе порасне, сака да стане свештеник, но и моден креатор.