1 во 500 милиони: Жена со две матки забремени истовремено во двете и роди здрави бебиња

Раѓањето на близначиња е мошне често, но раѓањето на бебиња од две различни матки е супер ретко, поточно шансите се еден во 500 милиони. Токму затоа доаѓањето на свет на Пајран и Попи се нарекува и „медицинско чудо“.

Џенифер Ешвуд останала вчудовидена кога на прегледот во 20-тата недела од бременоста докторите ѝ кажале дека има две матки и дека во двете носи бебе.

Состојбата „двојна матка“ не влијае негативно на зачнувањето, но го зголемува ризикот од спонтан абортус и предвремено породување. Најчесто жените кои имаат две матки носат бебе само во едната. На светско ниво, досега се регистрирани помалку од сто случаи на истовремено раѓање на бебиња од две матки.

Бебињата Пајран и Попи биле родени во 34 недела од бременоста со царски рез.

За необичното проширување на семејството, Џенифер изјавила: „Да имаш две матки е реткост сама по себе, а да имаш јајце клетка во двете и потоа тие да бидат оплодени и двете да бидат на вистинското место на одреден начин е чудо. Си мислиш дека го познаваш своето тело, но испаѓа дека не е така. Има многу, многу работа дома. Не спиеме многу ама немаше да спиеме и ако беше само едно бебе. Сега се двојно повеќе прегратки и двојно повеќе љубов.“

Џенифер и нејзиниот сопруг Ендрју имаат и 8-годишна ќерка.