Зои Блаж пресреќна: Доктор ѝ кажал дека никогаш нема да биде мајка, сега го прослави првиот роденден на ќеркичката
Зои Блаж и словенечкиот ракометар Тадеј Матијашиќ го прославија првиот роденден на ќеркичката Мариа.
Македонската блогерка Зорица, попозната како Зои Блаж, со емотивна порака и слатки фотографии го одбележа овој посебен ден. Со срце полно љубов и благодарност, таа ѝ го честиташе роденденот на својата малечка, која ја нарекува свое „чудо“, бидејќи ја добила откако докторите ѝ кажале дека никогаш нема да стане мајка.
Еве ја нејзината објава:
Ќерко моја мила,
Денес го славиме твојот прв роденден – една година откако го осветли мојот свет. Пред да дојдеш ти, не знаев колку љубов може да собере едно срце. Ти ме научи што значи вистинска, безусловна љубов.
Ти благодарам што ме избра мене да бидам твоја мајка. Ти благодарам што ме научи како се сака со цело срце, како се радува на мали нешта и како секој ден да има нова смисла. Со тебе научив дека најубавата титула на светот е – мајка.
Нека твојот живот биде исполнет со насмевки, здравје, љубов и среќа. Јас секогаш ќе бидам тука за тебе – твоја поддршка, твоја прегратка и твој најголем навивач.
Среќен прв роденден, мое мало девојче.
Те сакам повеќе отколку што зборовите можат да кажат. 💖Твојата мама 🥹🤍
Пред да ја добие Мариа, таа се соочувала со хормонален дисбаланс и екстремно зголемен пролактин, а ѝ бил откриен и тумор на хипофизата.
„Со овие резултати никогаш нема да бидеш мајка… Јас се срушив скроз“ – откри таа во интервју за Stars Show, присетувајќи се на тежок период од животот.
Сепак, таа никогаш не се откажала.
„Многу се посветив на Бога, почнав да се молам и да верувам во него. Благодарение на Господ и на вербата во него, ние денес ја имаме Мариа“ – раскажала Зои.
Денес, својата приказна ја споделува јавно за да им даде надеж и сила на други парови кои се соочуваат со слични предизвици.
„Го добив она што отсекогаш сум го сакала и за кое сум сонувала цел живот. Кога најмалку очекувавме, чудото ни дојде“ – изјавила таа во интервју за Hype TV.
Зои и Тадеј стапија во брак на 9 јули 2022 година, по шест години љубовна врска, а нивната ќеркичка Марија се роди на 12 мај 2025 година. Денес, една година подоцна, нивниот дом е исполнет со уште повеќе љубов, смеа и причини за славење.
