Зимска уметност на излози низ Скопје: Данче Ефтимова создава новогодишна магија на стакло

Данче Ефтимова креира магични дела на стакло кои се мали празнични приказни, во време кога на луѓето најмногу им се потребни радост и шаренило.

Со својата техника и чувствителност, талентираната девојка успева да ја внесе магијата на зимата таму каде што најмногу недостига – во урбаното секојдневие. Преку нејзините рачно насликани новогодишни мотиви на стаклени излози, кои им даваат душа на кафулињата и продавниците низ Скопје, го стоплува погледот на минувачите дури и во најстудените зимски мигови.

За Фемина, оваа инспиративна уметница раскажува како започнала приказната за празничната магија, колку труд и студ се крие зад секој еден мотив, што најмногу ја инспирира, но и како изгледа моментот кога нејзината зимска уметност се брише по празниците.

Осум години празнична магија на стакло

Данче вели дека првите чекори ги направила сосема природно, без големи планови.

„Првите новогодишни сликања ми беа пред осум години, но претежно во приватни домови, додека за многу брзо време почнав и со изработки за локали.“

Со текот на времето интересот експлодирал и денес, не може ниту да изброи колку излози има разубавено.

„Воопшто не знам, но од година за година бројката стана баш голема, за жал и не успевам сите да ги документирам. Условите за работа се доста сурови, ладно време, дожд, гужва од луѓе, со што некогаш и често се случува да не се успее да се стигне секаде.“

Оригинална техника и секој излог како ново платно

Иако многумина имаат свој „омилен“ излог, за неа секое ново стакло е нов предизвик и ново мини-уметничко дело.

„Новогодишните излози коишто јас ги работам се моја оригинална техника, која ја имам развиено во текот на годиниве. Елементите коишто ги користам се секаде исти, но зависно од просторот, адаптирани да секаде изгледаат различно, така што секое следно ми е лично омилено и ново искуство.“

Сигурно би се запрашале колку време треба за да се направи едно вакво дело. Температурата, дождот, локацијата – сето тоа има улога.

„Зависно од условите, но доколку се работи голема површина во слободен простор, изработката не трае повеќе од пет часа. Но, знае и да трпи чекање, доколку е дождливо или мајсторот – јас – настине 🙂 што е доста стресно и непријатно, но е нормален дел од ваквата сезонска ‘акција’“ - открива Данче.

Клиентите и нивните желби знаат понекогаш да бидат нереални, но секогаш се инспиративни.

„Сликањето на стакло бара доста слободна и истренирана рака за да изгледа совршено од секој агол, проценка од каде доаѓа дневна, а од каде вештачка светлина и дали мотивот изгледа примамливо од секој агол, бидејќи кога се работи на стакло, делото е на дофат на око од 360 степени што не е случај со муралите“ – објаснува Ефтимова.

Иако работела на многу локации, сепак има тип на простор што секогаш ѝ предизвикува посебна возбуда.

„Омилени ми се големите и широки застаклени простори, ми даваат поголема слобода и можност да се изразам максимално, особено кога се на удар на сончева светлина што уште толку го открива секое деталче на мотивот.“

Но, што по празниците?

На прашањето дали ѝ е жал кога излозите се бришат, изненадувачки нејзиниот одговор е негативен.

„Често клиентите кои првпат ме ангажираат се плашат за деликатноста на вадењето, за кое исто има доста лесна техника, па најчесто сум среќна, бидејќи и целта на тие изработки е да бидат сезонски 🙂. Убавата работа е што моите мотиви се повеќе зимски отколку новогодишни, па преживуваат и до февруари“ – заклучува таа.