Мај, најубавиот месец од годината, полека станува асоцијација за фестивалот на виното кој веќе втора година по ред ќе се одржи под отворено небо пред Веро Центарот. Од 8 до 12 мај посетителите ќе имаат уникатна можност на едно место да се запознаат со вкусовите на домашните вина, да дегустираат и уживаат во овој петдневен фестивал посветен на виното, храната и музиката.
„Минатата година овој фестивал иако го доживеа своето дебитантско искуство и за првпат јавноста имаше можност да го посети, се покажа како вистински погодок бидејќи побуди голем интерес, а ние се потрудивме да овозможиме одлична атмосфера вредна дружењето и оваа година да го повториме. Успеавме на едно место да собереме дури 10 домашни производители на вина, а за уживањето да биде комплетно поканивме 4 различни производители на сирења и сувомесни производи. Очекуваме и оваа година заедно со сите љубители на доброто вино да бидеме дел од овој фестивал на уживањето“ – изјави генералниот директор на Веро, Костас Теодосијадис.
Веро Винофест 2012
Покрај можноста да се запознаете и да ги дегустирате вкусовите на сите домашни винарници, за атмосферата да биде комплетна ќе се погрижат и бројните актуелни музички бендови кои ќе имаат свои настапи. Нокаут, Тони Китановски и Черкези, Фолтин, Чалгии, Air Strings, Пеперминт и многу други се само дел од музичката програма замислена специјално да го надоплни овој хедонистички фестивал кој ќе му овозможи на Скопје уживање за сите сетила. А в недела, на 12-ти мај, ексклузивно настапува новосадската акустична сензација - Фрајле!