„За сите што се свои и не се менуваат за другите“: Откако „растури“ во „The Voice of Germany“, Тина Русева ја објави првата песна
Тина Русева ја сними својата прва македонска авторска песна, насловена „Своја“.
Месеци откако „растури“ во германскиот „The Voice“ и докажа дека има импресивен глас, 20-годишната струмичанка го објави спотот за „Своја“, песна која несомнено ќе стане хит.
Текстот и музиката ги напишал Никола Буџак, а за аранжманот се погрижил Иван Кукиќ.
„Оваа песна е за сите што се свои, не се менуваат за другите и храбро го следат својот сон ✨🫶🏻“ – напиша таа.
Тина неколку години живее во Германија, но и покрај тоа, вели дека „секогаш ќе биде гласот на Македонија“.
„Прегорда сум што бев дел од Гласот на Германија, па и од Гласот на Европа, но јас секогаш ќе бидам гласот на Македонија“ – рече таа на сцената на Златна бубамара.
Во интервју за Фемина, Русева изјави дека пее „откако знае за себе“, а уште како девојче сонувала еден ден тоа да биде нејзината професија.
„Сите мои блиски отсекогаш ме охрабруваа и поддржуваа да го одам својот пат“ – рече Тина.
