Екипажот на „Артемис 2“ го собори рекордот за најдалечно патување од планетата Земја.
Четворицата астронаути испишаа нова страница во историјата на истражувањето на вселената, патувајќи подалеку од Земјата од кој било човек досега.
За време на нивното прелетување околу Месечината, екипажот на мисијата „Артемис 2“ го собори деценискиот рекорд поставен во ерата на Аполо. Астронаутите на НАСА, Рид Вајсман, Виктор Гловер и Кристина Кох, заедно со Џереми Хансен од Канадската вселенска агенција, летајќи во капсулата „Интегритет“, ја надминаа рекордната далечина од 400.171 километар која во април 1970 година ја постави екипажот на Аполо 13. Тие стигнаа до 406.771 км.
„Додека ја надминуваме најголемата оддалеченост на која луѓето некогаш патувале од планетата Земја, го правиме тоа оддавајќи им почит на извонредните напори и подвизи на нашите претходници во истражувањето на вселената.
Ќе го продолжиме нашето патување уште подалеку во вселената пред Мајката Земја да успее да нè повлече назад кон сè она што ни е драго, но, што е најважно, го избираме овој момент за да ја предизвикаме оваа и следната генерација да се погрижат овој рекорд да не трае долго време“ – порача тимот.
Историскиот настан беше проследен со силни емоции и поврзаност со минатото. Имено, големиот ден за астронаутите започна со порака за будење од покојниот командант на Аполо 13, Џим Ловел, снимена само два месеци пред неговата смрт во август.
„Добредојдовте во моето старо маало. Ова е историски ден и знам колку ќе бидете зафатени, но не заборавајте да уживате во глетката“ им порача Ловел.
НАСА редовно споделува импресивни фотографии од значајната мисија.
