Астронаутката на НАСА, Кристина Кох, е првата жена која патуваше надвор од нискоземјината орбита и ќе ја обиколи Месечината како дел од мисијата „Артимис II“.
Ова историско патување означува нов чекор во истражувањето на вселената и враќањето на човекот на Месечината.
„Многу им сум благодарна на оние кои го поплочија патот за јас да бидам овде и за сите ние да бидеме овде и чест ми е што потенцијално можам да ги инспирирам истражувачите на иднината“ - рече таа пред големото патување.
Како специјалист на мисијата, Кох има клучна улога во тестирањето на системите на вселенското летало „Орион“, вклучувајќи поддршка на живот, навигација и комуникација. Мисијата ќе трае околу 10 дена и ќе биде темел за идни мисии, меѓу кои и ново човечко слетување на Месечината и патувања кон Марс.
Патувањето до Месечината не е првпат Кох да руши бариери.
Славната астронаутка веќе го држи рекордот за најдолг непрекинат престој во вселената од страна на жена со дури 328 дена поминати на Меѓународната вселенска станица. Во 2019 година, исто така беше дел од првата целосно женска вселенска прошетка, што е уште еден историски момент.
Родена во Џексонвил, Северна Каролина, Кох уште од мала била инспирирана од ноќното небо.
Студирала на Државниот универзитет на Северна Каролина, каде стекнала дипломи по електроинженерство и физика, како и магистратура по електроинженерство.
Нејзиниот пат до вселената не бил лесен. Работела како инженер во Центарот за вселенски летови „Годард“, а подоцна учествувала во истражувања во екстремни услови на Антарктикот, Гренланд и Јужниот Пацифик.
Во поле во кое речиси 90% од астронаутите историски се мажи, нејзиниот лет претставува долгоочекуван пресврт.
„Мислам дека мојата порака е секогаш да ги правите работите кои можеби ве плашат, ве заплашуваат и кои мислите дека можеби се надвор од вашиот дофат. Но, всушност, кога ќе ги постигнете, најмногу учите за себе и најмногу му давате на светот“ – изјавила Кох во 2024 година.
