Влегоа како првоодделенци, излегоа како полуматуранти: Емотивно видео од скопско училиште покажува како времето лета
Секој крај на учебната година со себе носи бран емоции, а разделбите на полуматурантите со училишните клупи се секогаш исполнети со носталгија. Дека креативноста и убавата енергија сè уште тлеат во училишните дворови, докажуваат и учениците од едно скопско училиште кои снимија кратко интересно видео.
Учениците од IX-3 од ООУ „Лазо Ангеловски“ создадоа приказна која брзо се шири на социјалните мрежи и мами насмевки, но и по некоја солза.
Преку симболична и визуелна идеја, тие го прикажаа своето деветгодишно патување: мали првачиња (кои ги претставуваат нив на почетокот) влегуваат во училницата со љубопитни погледи, а од истата врата излегуваат тие денес, веќе пораснати, похрабри и подготвени за новите животни поглавја.
Прочитајте ја и нивната емотивна порака:
🎒Некогаш со ранци поголеми од нас и со очи полни љубопитност зачекоривме низ училишната врата за првпат. Денес, девет години подоцна, излегуваме од неа повисоки, похрабри и побогати за безброј спомени.
✨Меѓу овие ѕидови пораснавме, другарувавме, учевме да победуваме, но и да стануваме по силни по секој предизвик. Времето тивко леташе, а денес остануваат насмевките, прегратките и моментите што засекогаш ќе живеат во нашите срца.
❤️Основното училиште завршува, но приказната на IX³ што ја создадовме заедно ќе трае вечно.