Вероника Консевиќ од Македонија се бори за бронза, со 11-месечното бебе отпатува на Игрите во Таранто
Македонската борачка Вероника Консевиќ ќе се натпреварува за бронзениот медал на Медитеранските игри, каде настапува во слободен стил во категоријата до 57 килограми.
Покрај досегашната одлична борба, посебно внимание привлече и нејзината посветеност надвор од спортскиот терен. Имено, 27-годишната спортистка во Италија отпатува заедно со своето 11-месечно бебе и покажа дека мајчинството не е пречка да ги следи своите спортски цели. Таа е до него на паузите, а тоа, пак, си лази по теренот и е омилено меѓу натпреварувачите. Иако е мало, сепак е најголема поддршка за мама.
Консевиќ е единствената македонска претставничка во слободен стил на овие Игри. Денес ја очекува дуел против српската борачка Милица Перовиќ, во кој ќе има шанса да се закити со бронзен медал и да го заокружи својот настап во Таранто со одличен резултат.
