Уникатни керамички куќички, рачно нацртани лампиони - Маја од Скопје создава празнична магија
Уметницата Маја Wolf изработува мали светови во кои живеат топлината, детството и празничната магија. Низ нејзините керамички куќички што светат, лампиони со приказна и бои што мирисаат на детство, оваа грнчарка нè потсетува зошто Божиќ со најмилите е едно посебно чувство, а не обврска.
За Фемина, открива дека е човек длабоко вљубен во природата, животните, уметноста и универзумот. Но, пред сè, дека останува дете кое секогаш верува во магија.
„Сѐ уште верувам дека сѐ е возможно. Од кога конечно си ја сфатив мојата улога на земјава, најдов начин како да ги пренесам таа љубов и магија, како да го разбудам детето што спие во сите нас, она дете кое веруваше дека сѐ е возможно, што гледаше убавина во едноставните нешта“ – вели таа.
По стапките на прадедо ѝ, Маја се враќа кон керамиката, но и кон себе. Самоука уметница, која црта и слика од кога памети за себе, таа низ керамика, дрво и платно ја пренесува својата внатрешна магија кон светот.
Нејзината најнова колекција, симболично наречена „Christmas of my heart“, е составена од 10 рачно изработени керамички куќички, секоја со своја приказна. Направени со радост, топлина и љубов, тие се создадени да внесат чувство на дом, мир и празнична нежност.
Љубовта кон ваквите украси, вели Маја, започнала уште во детството. Керамичките новогодишни и божиќни украси што тогаш ги купувала и денес ги чува и ги вади секој Божиќ.
„Кога ќе здогледам керамичка куќичка што свети, чувствувам топлина во душата, некоја магија на безвременски простор, едноставно за миг сѐ запира. Само мислата на топол дом исполнет со смеа, радост и најубавата, бајковита, божиќна атмосфера“ – раскажува таа.
Голема улога во создавањето на таа магија имала нејзината мајка, која секогаш правела празниците да бидат посебни, со украси, балони и дури три елки. Денес, таа традиција ја продолжува Маја, која Божиќ го прави магичен за својата ќерка. Но, годинава сакала магијата да ја сподели и со другите.
Процесот на создавање не е ниту краток, ниту лесен. За куќичките ѝ биле потребни речиси три недели работа, а за лампионите уште една. Во една куќичка, вели, има вложено повеќе од 12 часа активна работа, без да се смета времето за сушење.
Инспирацијата за лампионите доаѓа од една семејна традиција – секој Божиќ, со сопругот купуваат по еден лампион што ја одбележува таа година. Елката кај нив е полна со спомени: лампиони од детството на мајка ѝ, рачно изработени, секој со своја приказна.
„Со овие рачно цртани лампиони сакам да создадам спомени и во другите домови“ - вели Маја.
Одзивот, признава, ја изненадил и ја исполнил. Имено, половина од колекцијата веќе е продадена, а пораките и коментарите се полни со емоции. За неа, тоа е доказ дека магијата сè уште живее меѓу луѓето.
На крајот, нејзината новогодишна порака е едноставна, но силна:
„Повеќе да веруваме во добрина и магија. Да му напишеме писмо на Дедо Мраз, затоа што тој не носи само играчки.“
Даница Караташова Илиоска / Femina.mk