Ултра екстравагантна: Ријана во свилена креација со 115.000 кристали со Ејсап Роки на МЕТ балот
Ријана апсолутно доминираше на МЕТ галата со стајлинг кој совршено го интерпретираше зададениот дрес-код „Модата е уметност“. Традиционално, славната пејачка беше меѓу последните гости кои пристигнаа на скалилата пред музејот „Метрополитен“ во Њујорк.
На најгламурозната ноќ во светот на модата, 38-годишната пејачка блесна во впечатлива металик креација од Maison Margiela, дизајнирана од Глен Мартенс. Фустанот, изработен од луксузна свила со вметнати бакарни нишки, беше украсен со повеќе од 115.000 кристални зрнца, антички накит и синџири, а за неговата изработка биле потребни над 1.300 часа.
Ниту Ејсап Роки не остана незабележан. Тој носеше розова креација од Chanel, надополнета со црни детали и впечатливи модни додатоци, а се смета дека изгледот бил во чест на неговата нова улога – татко на девојче.
Роки не штедеше зборови за својата сакана и ја опиша како „уметност и уметник во едно“, додавајќи дека таа „сјае како дијамант“.
Темата на годинешната свеченост беше „Costume Art“ (Костимска уметност) во чест на истоимената изложба во Музејот која ќе биде отворена за јавноста од 10 мај.
