„Твојот „обичен“ ден е нечија најголема молитва“: Марко Пејчиновски со моќна порака која ќе ве замисли
Марко Пејчиновски испрати моќна порака и ќе ве натера да се запрашате колку сте всушност среќни со самото тоа што имате „нормален“ живот.
Младиот Охриѓанец, кој со својата животна приказна инспирира илјадници луѓе, преку објава на социјалните мрежи потсети колку често ги земаме здравјето, времето и секојдневните работи „здраво за готово“.
Дваесетгодишниот спортист, кој уште на 12-годишна возраст го преплива Охридското Езеро и со години покажува дека упорноста е посилна од сите животни препреки, преку видео ги повикува луѓето да бидат поблагодарни за она што го имаат.
„Мојот живот е премногу тежок.“ – 53 милиони луѓе во моментов се борат со рак.
„Зошто сите лоши работи ми се случуваат мене?“ – 43 милиони луѓе се слепи и не можат да го видат Божјото создание.
„Ќе почнам од утре.“ – 170.000 луѓе нема да го дочекаат утре.
„Не ми се допаѓа што има за вечера.“ – Секој единаесетти човек синоќа си легнал гладен.
„Твојот 'обичен' ден е нечија најголема молитва. Биди благодарен за сè“.
Во интервју за Фемина, Марко неодамна искрено зборуваше и за најтешкиот период во својот живот, загубата на мајка му, која, како што раскажа, била неговата најголема поддршка и инспирација.
„Тоа што прерано си замина не ја спречи мајка ми да ме научи на многу вредни нешта. Најважното нешто што ме научи, а кое и денес ме води низ животот, е верата во Бога. Не ме натера со сила да верувам, ми го покажа патот, а јас цврсто зачекорив по него. Знам дека и јас на ист начин ќе ги учам моите деца“ - изјави тогаш Пејчиновски.