„Тивкиот херој на Делчево“: 18-годишниот Огнен пронајде 4.000 евра и ги врати, доби плакета од градоначалникот

Чесноста не се мери со години, туку со постапки.

18-годишниот Огнен Малешевски од Делчево пронашол голема сума пари на јавна површина и одлучил да ги предаде во полиција за да се вратат кај сопственикот.

Младиот делчевец наиде на 4.000 евра за време на викендот, а неговата чесност и одговорност не останаа незабележани. За својот потег, Огнен доби плакета од градоначалникот на Општина Делчево, Иван Гоцевски, кој го прими младиот херој и јавно му оддаде признание за постапката.

„Денешниот работен ден го започнав со прием на нашиот тивок херој Огнен Малешевски. Момчето кое со својот пример ја восхити целокупната јавност без да побара грам внимание за својот подвиг“ - сподели градоначалникот.

Тој истакна дека граѓаните на Делчево можат да бидат горди, нагласувајќи дека постапката на Огнен претставува вистински пример за граѓанска одговорност и чесност.

„Капка пример вреди повеќе од река совети, а овој пример на Огнен зборува за нашето Делчево на најубав можен начин“ - порача Гоцевски.