Терапевтска активност: Артист создава уметност на плажа, тврди дека му влијае позитивно на менталното здравје

Маж кој се занимава со ленд-арт создава интересни дела од материјали кои ги наоѓа на земјата и тврди дека тоа позитивно му влијае на менталното здравје.

Џон Форман ја открил земјената уметност како студент и веднаш се заљубил во неа. Тој пред сè користи камења и школки кои ги подредува на креативни начини, мамејќи го вниманието на посетителите. Престојот во природа во комбинација со релаксирачката активност, како што вели тој, имаат терапевтски ефект кај него.

„Најчесто или започнувам со груба идеја за она што ќе го правам или немам никаква идеја. Потоа, ги собирам материјалите кои можам да ги носам и започнувам да редам камен по камен, полека губејќи се себеси во процесот и исклучувајќи се од стресот на секојдневниот живот.“

„Има бесконечно многу можности. Не само тоа, туку безброј места во нашата околина за работење, секое поразлично од следното. Излегувањето и создавањето имаше длабок ефект на моето ментално здравје. Ми го одржува умот здрав и среќен“ – вели Џон.