Филмската магија е во полн ек во Битола – започна 45-тото издание на „Браќа Манаки“.
Под слоганот „Еден е Манаки“, а со канскиот хит „Партенопе“ и со црвен тепих, свечено беше отворен првиот и најстар фестивал посветен на креативноста на светските кинематографери.
Во Центарот за култура во Градот под Пелистер се собраа македонски и светски ентузијасти за филмската уметност, за да ја продолжат традицијата во чест на пионерите Јанаки и Милтон Манаки.
Директорот на Фестивалот, Симеон Мони Дамевски, во неговото обраќање до публиката во преполната сала рече:
„Оваа година наши учесници и гости на фестивалот се мајстори на филмската фотографија кои заедно имаат освоено 8 Оскари, 16 номинации за Оскар, 12 награди БАФТА и уште 19 номинации за истата награда, 11 награди од Американското друштво на кинематографери, 8 награди од Британското друштво на кинематографери, 6 награди на Канскиот филмски фестивал, 1 награда во Венеција, 3 награди во Берлин, 6 ЕМИ награди, 1 азиски Оскар... сите овие луѓе годинава ќе шетаат по улиците на Битола. Ќе шетаат по Широк сокак. Ете затоа еден е ‘Манаки’ и една е Битола, како голем центар на филмската уметност“.
„Партенопе“ со Гери Олдман и Стефанија Сандрели во главните улоги го отвори популарниот Фестивал, кој ќе биде затворен на 27 септември со македонскиот филм „Убиј ги прво децата“ на Димитар Оровчанец.
Во текот на седум фестивалски дена, публиката ќе ужива во 65 филмски остварувања.
Погледнете фотографии од црвениот тепих:
Фото: Ивона Кочов / Александар Василевски / Femina.mk