Слични невестински фустани, свадба на Сардинија: Актерката Ребел Вилсон се венча со саканата Рамона

Викендов, Ребел Вилсон и Рамона Агрума стапија во брак на романтична церемонија на Сардинија.

44-годишната актерка и 40-годишната дизајнерка на накит се заколнаа на вечна љубов во речиси идентични волуменозни венчаници од Pronovias. Двете невести ја споделија првата фотографија направена во Порто Черво.

„Во брак. Сардинија Sardinia 28.9.24“ – стои во описот.

Интимната церемонија беше фотографирана од папараците. Тие ги уловија Ребел и Рамона додека си разменуваа бакнежи.

Иако свадбата била планирана за следната година, Ребел одлучила да ја организира порано.

„Ребел е многу возбудена што ќе стапи во брак со љубовта на нејзиниот живот. Таа е лудо вљубена и не може да дочека да стапи во брак. Тоа ќе биде мала церемонија со најблиските пријатели и семејството, која ќе биде и многу елегантна“ – рекол извор на Daily Mail пред свадбата.

Парот се запозна во 2021 година, а се вери во февруари 2023 година. Тие имаат една ќерка, родена од сурогат-мајка, која ќе наполни две години во ноември.