Скарлет Јохансон ги претвори улиците на Менхетен во своја модна писта.
Додека се упатуваше во студиото на „The Late Show With Stephen Colbert“ во Њујорк, 40-годишната актерка остави силен впечаток со црн миди фустан од актуелната pre-fall колекција на Балман, дизајнирана од Оливие Рустан.
Фустанот без прерамки, со деколте во форма на срце и суптилно нагласени линии, совршено ја истакнуваше нејзината силуета. Дизајнот беше надополнет со шлиц на задниот дел и црн впечатлив ремен со златни детали.
Скарлет го заокружи изгледот со црни сандали со тенки ремчиња, накит од брендот Sidney Garber, како и црвен кармин кој внесе доза на гламур. За овој моден избор беше заслужна стилистката Кејт Јанг, позната по соработките со Дакота Џонсон и Џулиен Мур.
Јохансон го промовира филмот „Eleanor the Great“, кој е нејзино режисерско деби. Филмот ја следи приказната на Еленор, која по голема загуба започнува патување полно изненадувања. Премиерата во кината е закажана за петок.