Скапоцен момент: Невеста од Скопје ја облече венчаницата на баба си и ја изненади до солзи
Катерина Димова со прекрасен гест ја израдува својата баба. Невестата од Скопје ја облече венчаницата која баба ѝ ја носеше пред 57 години и ја изненади.
Во видео кое го објави на Instagram, Катерина облечена во фустанот стар речиси шест децении стои во собата и со топла прегратка ја дочекува својата баба.
Како системски терапевт, таа ја објасни суштината на овој нејзин потег со прекрасни зборови:
„ Во системската терапија велиме дека припадноста е една од нашите најдлабоки потреби.
Денес ја чувствувам во секој конец од овој фустан. 57 години подоцна, венчаницата на баба ми е на мене — потсетник дека љубовта, корените и припадноста се пренесуваат низ генерации.“
Во време кога често забораваме од каде доаѓаме, Катерина потсетува дека невидливите семејни нишки се оние кои нè држат исправени во животот. Ткаенината стара речиси шест децении стана мост помеѓу минатото и иднината, помеѓу две генерации жени кои ја делат истата крв и истата безусловна љубов.