Силен удар за Блејк Лајвли: Судија ги отфрли обвинувањата за сексуално вознемирување против Џастин Балдони

Правната битка меѓу Блејк Лајвли и Џастин Балдони доби драматичен пресврт откако федерален судија во Њујорк ги отфрли најсериозните обвинувања во случајот, вклучително и оние за сексуално вознемирување.

Од вкупно 13 точки, дури 10 се отфрлени, со што процесот значително се стеснува непосредно пред закажаното судење во мај. Остануваат обвиненијата за одмазда, помагање при одмазда и прекршување на договор, области кои се далеку покомплексни за докажување.

Одбраната на Балдони веќе го претстави исходот како јасна правна победа.

„Многу сме задоволни што Судот ги отфрли сите обвинувања за сексуално вознемирување“ – изјавија неговите адвокати, нагласувајќи дека она што останува е „значително стеснет случај“.

Но, зад оваа одлука не стои едноставен заклучок дека ништо не се случило.

Суштината на пресвртот лежи во статусот на Лајвли. Судот утврдил дека таа работела како независен соработник, а не како вработена, што директно ја ограничува можноста овие наводи да се третираат како класичен случај на работно место и сексуално вознемирување според одредени закони. 

Дополнително, договорот на кој се повикува никогаш не бил потпишан, што го прави правно неважечки.

Во меѓувреме, тимот на Лајвли инсистира дека суштината на спорот никогаш не била само во наводното однесување на сетот на „It Ends With Us“, туку во она што следело потоа – наводна координирана кампања за уништување на нејзиниот углед.

Според нив, актерката била мета на дигитални напади откако укажала на проблеми со безбедноста за време на снимањето. 

Од другата страна, позицијата на Балдони останува дека сите активности биле легитимна реакција за заштита на сопствената репутација.

Токму ова ќе биде во фокусот на судењето закажано за 18 мај во Њујорк.