„Си заминавте како што се запознавте“: Трогателна објава за брачниот пар од БиХ кој загина планинарејќи на Елбрус
Трагедијата на Елбрус во Русија го потресе регионот откако петмина планинари од Зеница, Босна и Херцеговина, ги загубија животите заглавени во ненадејна и силна бура.
Меѓу жртвите е и брачниот пар Алма и Денис Окановиќ, чија љубовна приказна започнала токму на планина. Нивна блиска личност преку социјалните мрежи се прости од нив со потресни зборови кои нема да ве остават рамнодушни:
„Најдраги мои, си заминавте како што се запознавте, на планинските височини. И јас со вас ги запознав сите убавини на дружењето и планинарењето и исто така ги засакав. Ви благодарам за бескрајната љубов и поддршка во сè“
Во кобната експедиција животите ги загубија и докторката Мелиха Чаушевиќ, Алмир Кривдиќ и Нермин Талам. Во несреќата успеаја да преживеат само двајца членови на групата, Харис Адиловиќ и Кемал Видимлиќ, кои беа спасени и згрижени.
Според информациите од руските власти и медиуми, групата искусни планинари од Зеница се соочила со силни ветрови и екстремен пад на температурите на надморска височина од над 5.000 метри. Руски експерти наведуваат дека главна причина за катастрофата била лошата проценка во услови на ненадејна временска промена, бидејќи и покрај предупредувањата и повлекувањето на другите групи, тие се надевале дека ќе успеат да ја совладаат бурата. Дополнително, рускиот Истражен комитет отвори кривична истрага за да се утврдат сите околности околу организацијата на патувањето и искачувањето без лиценциран локален водич.
Спасувачките тимови се соочуваат со екстремно тешки услови на теренот поради силниот ветар, кој сè уште ја оневозможува целокупната евакуација на телата од височините на Елбрус. Регионот останува во длабока тага по загубата на страсните љубители на природата.