70-годишната Крис Џенер во наметка на Елизабет Тејлор – приказната зад уникатната креација

Крис Џенер прошета по црвениот тепих во Рим во парче модна историја кое носи неверојатна приказна.

70-годишната мајка и менаџерка на сестрите Кардашијан и Џенер се појави на премиерата на втората сезона на серијата „All’s Fair“ во впечатлива црна наметка која некогаш ѝ припаѓала на холивудската легенда Елизабет Тејлор.

Џенер ја сподели приказната за ова уникатно модно парче на социјалните мрежи, откривајќи дека Тејлор ја носела наметката во 1969 година, на балот организиран во чест на 40-тиот роденден на принцезата Грејс Кели во Монте Карло.

Станува збор за наметка наречена „Scorpio“, дизајнирана од модната куќа Tiziani Roma. Балот бил познат како „Scorpio Ball“, а поканети биле само луѓе родени во знакот на Скорпија или оние кои биле во брак со Скорпија. Елизабет Тејлор присуствувала на настанот со својот сопруг Ричард Бартон, кој бил роден во овој хороскопски знак.

„Каква неверојатна чест е да се носи ова извонредно архивско парче од модната историја во Рим“ - напиша Џенер, откривајќи дека и самата е Скорпија и дека се чувствува благословено што ова прекрасно парче од архивата на Елизабет Тејлор е дел од нејзината колекција.

Црната кадифена наметка со впечатливи сребрени детали во форма на скорпии, бела постава и висока, скулптурална јака изгледаше драматично и елегантно. Џенер го надополни изгледот со дијамантски накит и бели ракавици, создавајќи стајлинг достоен за холивудскиот гламур од минатото.