Сексуализира малолетнички, пее за жигосување и помовира педофилија: Балканот згрозен од спотот на контроверзен тиктокер, го приведоа во Србија
Српски инфлуенсер и TikTok-креатор беше приведен поради музички спот кој предизвика бурни реакции во јавноста со содржината за која постојат сомнежи дека промовира педофилија и сексуална злоупотреба на малолетници.
Марко Радмановиќ, познат како Фараон, беше одведен на информативен разговор по објавувањето на видеозаписот за песната „Žig zveri“ откако беше објавено дека дел од видеото е снимено во детска игротека и содржи сцени, дијалози и стихови кои многумина ги оценија како кои се вознемирувачки и скандалозни.
Во спотот, кој сега е отстранет, се појавува икона со ликот на тиктокерот со натпис „Свети татица“, а на почетокот се слуша дијалог во кој девојче му се обраќа со зборовите: „Свети татице, не бев добра, ќе ме казниш ли?“, на што следува одговор: „Секако, душо“.
Дополнително внимание предизвикаа и стихови во кои се споменуваат малолетни лица и реченицата: „На Бог се молат грешници, а на фараоните малолетници“.
На социјалните мрежи беше покрената и петиција за гасење на профилите на Марко, а родители и бројни корисници изразија загриженост поради влијанието кое ваквата содржина го има врз децата и тинејџерите.
На профилот „Безбедност на децата на интернет“, стои податок дека деца на возраст од само 10 години ја препознавале песната и ја знаеле напамет.
Според српското МВР, припадници на Службата за борба против високотехнолошки криминал, во соработка со обвинителството, извршиле претрес во домот на Радмановиќ и привремено му ги одзеле мобилните телефони, компјутерите и другите електронски уреди за форензичко вештачење.
По неколкучасовниот разговор во полиција, Радмановиќ бил пуштен на слобода, додека истрагата продолжува. Тој на TikTok објави видео во кое тврди дека не е поднесена кривична пријава против него и дека инспекторите не пронашле докази за кривично дело.
„Три часа ме задржаа, ми ги одзедоа телефоните, лаптопите и хард-дисковите, го претресоа целиот стан. На крајот не најдоа ништо што упатува на кривично дело“ – изјавил тој и додал дека ќе ги тужи медиумите кои ширеле невистини.
Од српското МВР соопштија дека форензичкото вештачење на одземените уреди е во тек и дека обвинителството ќе донесе одлука за понатамошниот тек на постапката по прибирањето на сите докази.
Во меѓувреме, неговиот TikTok-профил е деактивиран, а надлежните институции побарале отстранување и на спорната содржина од другите платформи, додека истрагата продолжува.