„Секогаш ќе бидам гласот на Македонија“: Тина Русева со награда и моќен настап на „Златна бубамара“

Синоќа се одржа 29. издание на престижната манифестација „Златна бубамара на популарноста“, која традиционално ги наградува најуспешните и најпопуларните имиња од домашната сцена.

Еден од највпечатливите моменти на вечерта беше настапот на младата пејачка Тина Русева, која специјално допатува од Германија за да присуствува на настанот.

Со нејзината изведба на песната „Не допирај ме“, оригинално изведена од легендарната Маја Оџаклиевска, таа ја освои пуликата. Нејзиниот силен вокал и емотивна интерпретација предизвикаа големи аплаузи и позитивни реакции.

Како признание за нејзиниот талент и брзиот подем на музичката сцена, Русева ја доби наградата за Најперспективна млада пејачка. При примањето на наградата, таа се обрати до публиката со емотивни зборови:

„Прегорда сум што бев дел од Гласот на Германија, па и од Гласот на Европа, но јас секогаш ќе бидам гласот на Македонија.“

Откако блесна на сцената, Русева за Фемина сподели:

„Импресиите се навистина силни. Целиот настан беше одлично организиран и на високо ниво. Ова признание го доживувам како голема одговорност, но и како поттик за понатамошен развој. Настапот пред толку реномирана публика беше чест и искуство што долго ќе го паметам.“