„Секогаш ја криев левата рака, но не треба“: Олимпијка родена без три прсти освои сребрен медал на ЗОИ

Флоренс Брунел испиша инспиративна приказна на Зимските олимписки игри во Италија.

Канадската олимпијка, која е родена без три прсти на левата рака, освои сребрен медал во дисциплината мешана штафета на 3.000 метри во брзо лизгање.

Иако на прв поглед отсуството на прсти можеби не изгледа како голема пречка во брзото лизгање, натпреварувачите често ги користат рацете за баланс при влегување во свиоци. Таа користи специјално изработена ракавица која ѝ помага при контактот со мразот.

Брунел уште во 2022 година стана најмладата натпреварувачка во брзо лизгање на кратка патека која се пласирала во канадскиот олимписки тим. Но, нејзиниот дебитантски настап тогаш се претвори во вистински кошмар откако беше казнета по судир со противничка лизгачка, а Канада го заврши натпреварувањето дури на шестото место.

Четири години подоцна, Флоренс се врати уште посилна и му помогна на својот тим да го освои второто место.

„Секогаш ја криев левата рака. Не треба“ – напиша таа претходно во објава на социјалните мрежи.