Се запознаа случајно, таа не сака брак, а сега се неразделни: Златан Ибрахимовиќ со 11 години постарата партнерка на ЗОИ

Иако со години го освојуваше стадионот Сан Сиро како играч на Интер и Милан, Златан Ибрахимовиќ на свеченото отворање на Зимските олимписки игри не беше на теренот, туку во публиката. 

44-годишниот поранешен фудбалер пристигна во друштво на својата партнерка Хелена Сегер, која е 11 години постара од него. Парот веднаш го привлече вниманието со усогласени црни модни комбинации.

Ибрахимовиќ имаше и посебна улога во рамки на Олимписките игри. Поранешниот шведски репрезентативец ја носеше Олимписката бакла низ улиците на Милано, неколку часа пред официјалната церемонија.

Откако се заедно, Хелена му е силна поддршка на Златан.

Тие имаат интересна љубовна приказна. Иако многумина сметаат дека таа е со него поради славата и парите, тоа воопшто не е така. Уште пред да се запознаат, Хелена беше успешна бизнисменка, а денес нејзиното богатство е проценето на 160 милиони долари.

Парот се запозна сосема случајно во Малме. Тој имаше 21 година, а таа 32.

„Го остави своето Ферари лошо паркирано во Малме и го блокираше мојот Мерцедес. Не бев расположена и му се развикав да го мрдне автомобилот. Му реков веднаш да го тргне автомобилот и тој виде нешто што му се допадна“ – рекла таа за моментот кога се запознаа.

И покрај тоа што се заедно 20 години и имаат две деца, тие не се во брак.

„И јас имам важно минато. Стојам до Златан, но ја изградив мојата кариера со многу жртви. Не сакам да се омажам, бидејќи сакам да бидам независна и не сакам да ме етикетираат како жената на фудбалерот. За мене и вака е тешко, луѓето не знаат колку многу учев, работев и се борев“ – рекла таа во интервју.