„Сè изгледаше како сон од кој не сакав да се разбудам“: Александра од Свети Николе за романтичниот предлог за брак пред Ајфеловата кула

Има моменти во животот кои се толку совршени што навистина личат како од фантазија. 

Најголемиот сон на Александра Трајчева од Свети Николе стана реалност, кога нејзиниот партнер Петар Митев клекна на едно колено во Париз и ѝ предложи брак.

24-годишната девојка за Фемина сподели дека цел живот сонувала дека овој момент ќе ѝ се случи токму во француската метропола, а нејзиниот избраник се погрижил тоа да биде на најромантичниот можен начин.

Петар ја запроси Александра на локација со одличен поглед на Ајфеловата кула. Местото беше украсено со стотици црвени рози, а во средина на огромно срце пишуваше: „Ќе се омажиш ли за мене?“.

Уште од мала сонував за Париз – градот на љубовта, светлината и магијата. Отсекогаш сакав токму тој момент да го доживеам во Париз, а животот ми приреди повеќе отколку што можев да посакам.

Во тие неколку секунди моите емоции беа измешани – среќа, возбуда, љубов, изненадување… Сè изгледаше како сон од кој не сакав никогаш да се разбудам. Атмосферата беше толку магична што секој детаљ ќе остане врежан во моето срце засекогаш.

Во мигот кога Ајфеловата кула почна да свети, како да светна и мојот свет. Заедно со нејзините илјадници светилки, заблеска и дијамантот на мојата рака – симбол на една нова животна приказна што токму тогаш започна.

Без двоумење го кажав моето најискрено „ДА!“. Во тој момент знаев дека покрај себе го имам човекот со кој сакам да ги поминам сите идни денови, сите радости и сите предизвици што животот ќе ни ги донесе.