Самохраната мајка на првите близначки со Даунов синдром во регионот на нивниот 18. роденден: „Секој тежок момент вредеше“
Животната приказна на Сара Беро е приказна за мајчинска љубов, сила и истрајност.
Самохраната мајка од Црна Гора, која ги израсна Илда и Ирма, првите близначки со Даунов синдром во регионот, сега има уште една причина за гордост – нејзините девојки станаа полнолетни.
Сара сподели фотографии од прославата на која близначките позираат во бели фустанчиња покрај помалата сестричка.
По тешкото породување и деновите поминати во кома, Сара се соочила со дијагнозата и со сурови совети дека треба да ги остави своите ќерки во болница. Наместо тоа, таа избрала да остане покрај нив и цели 18 години ја гради и ќе продолжи да ја гради нивната приказна исполнета со љубов, борба и безусловна посветеност.
Денес, кога ги гледа своите ќерки насмеани и среќни, вели дека секој тежок момент вредеше. По повод нивниот 18. роденден, Сара објави и емотивна порака во која се присети на годините кои ги поминале заедно и им се заблагодари на сите кои биле дел од нивната радост.
18 години љубов која победи сè. ❤️
Ова не е само прослава на полнолетството. Ова е круна на 18 години бескрајна, безусловна и лавовска љубов.
Денес, кога ги гледам вака големи, убави и насмеани, знам дека секој тежок момент вредеше. Нивните очи зборуваат повеќе од илјада зборови – зборуваат за љубов, сила, победа и за сè што заедно поминавме.
Но, овој ден не им припаѓаше само нам. ❤️
Од срце сакам да ви се заблагодарам на сите вас кои бевте дел од нашата радост. Ви благодарам за илјадниците пораки, повици, честитки, прегратки и убави зборови кои ни пристигнаа од сите страни.
Посебна благодарност до сите драги луѓе кои со своето присуство ја збогатија оваа прослава и направија нивниот 18. роденден да биде ден кој ќе го паметиме цел живот. Ви благодарам што бевте покрај моите девојчиња и што заедно со нас го прославивте нивното полнолетство.
Благодарам и на сите кои на кој било начин придонесоа оваа вечер да биде толку посебна.
Едвај чекам да споделам со вас сè...
Сара, која живее во Подгорица, забременила на само 19 години, а како што раскажува, бременоста била целосно уредна и ништо не укажувало дека нејзините девојчиња ќе имаат потешкотии во развојот. Таа се породила во седмиот месец од бременоста, а породувањето било исклучително тешко и таа два дена била во кома.
По околу 40 дена, лекарите ѝ ја соопштиле дијагнозата која засекогаш ѝ го променила животот.
„Генетичар ми кажа дека имам близначки со проблеми во развојот, дека нема да можат да зборуваат, ниту да го прават она основното. Ми рекоа: ‘Вие сте млада, треба да ги оставите во болница, тие вас не ви требаат за ништо. Таквите деца се оставаат’“ - раскажала Сара.
Денес, Сара вели дека нејзините ќерки се исполнети со љубов, внимание и топлина која не може да се опише со зборови.
