„Ми рекоа да ги напуштам ќерките затоа што имаат Даунов синдром“: Мајка од Црна Гора со емотивна исповед
Животната приказна на Сара Беро никого не остава рамнодушен. Самохраната мајка на првите близначки со Даунов синдром во регионот отворено проговори за најтешките моменти низ кои поминала по породувањето, но и за безусловната љубов кон своите 17-годишни ќерки Илда и Ирма, кои денес ги нарекува „смислата на животот“.
Сара, која живее во Подгорица, забременила на само 19 години, а како што раскажува, бременоста била целосно уредна и ништо не укажувало дека нејзините девојчиња ќе имаат потешкотии во развојот. Таа се породила во седмиот месец од бременоста, а породувањето било исклучително тешко и таа два дена била во кома.
По околу 40 дена, лекарите ѝ ја соопштиле дијагнозата која засекогаш ѝ го променила животот.
„Генетичар ми кажа дека имам близначки со проблеми во развојот, дека нема да можат да зборуваат, ниту да го прават она основното. Ми рекоа: ‘Вие сте млада, треба да ги оставите во болница, тие вас не ви требаат за ништо. Таквите деца се оставаат’“ - раскажала Сара.
Нејзиниот татко, кој тогаш бил покрај неа, останал шокиран од зборовите на докторите.
„Дали сте вие нормални? Моите внуки да растат во дом?“ – им возвратил тој.
По породувањето, Сара била скршена и му рекла на татко ѝ: „Кога Бог даваше среќа, заборави на мене.“
Но, неговиот одговор ѝ дал сила да продолжи понатаму.
„Бог им ги дава најголемите искушенија на најјаките луѓе. Тој нè избра нас затоа што знае дека ќе ги пазиме, ќе ги сакаме и ќе ги чуваме. Немој да се грижиш, тато е тука. Сè ќе биде во ред“ – ѝ рекол тој.
Денес, 17 години подоцна, Сара вели дека нејзините ќерки се исполнети со љубов, внимание и топлина која не може да се опише со зборови.
„Најважно ми е тие да се среќни и никогаш да не видам солзи на нивните лица“ – вели Сара, која има уште една помала ќерка.
„Моите прекрасни сестри, јас ги сакам и чувам како очите во главата“ – вели Ина за своите сакани сестри.
Сара денес е претседателка на здружението „Љубов за љубов“, прво во Црна Гора кое работи со деца и лица со Даунов синдром. Покрај тоа, има и свој бизнис и бренд за парфеми, а секојдневно јавно зборува за важноста од прифаќање и емпатија.
„Кога со девојчињата ќе влезев во игротека или јавен простор, луѓето нè гледаа како вонземјани. Сакав да им објаснам дека Дауновиот синдром не е ништо страшно и дека на овие деца најмногу им треба љубов“ – вели Сара.
Во една од нејзините најемотивни објави пишува:
Имав избор…
Можев да заминам, да ве оставам, да бидам некој друг.
Но, јас ве избрав вас.
Полни 17 години борба, љубов, жртвување и сила.
Имаше денови кога беше тешко… претешко.Но, никогаш не се откажав.
Нека зборуваат што сакаат, но едно не можат —
не можат да ја намалат мојата жртва и љубовта што ви ја дадов.
Сè што денес имате и каде што сте,
израсна од таа борба.И повторно би го избрала истото. 🫀🫀
