Моника Белучи го краси новото издание на списанието Sunday Times Style.
За декемврискиот број, 57-годишната актерка позираше во креации од различни брендови како Arlington, Giorgio Armani, Nensi Dojaka и Miu Miu.
Во интервјуто, италијанската убавица отворено зборуваше за возраста, изгледот и стареењето на природен начин.
„Има многу жени кои се чувствуваат слободно да стареат на поразличен начин“.
„Кога сте млади, го имате она што во Франција го нарекуваат La Beauté du diable, убавината на ѓаволот, што е природно, тоа е убавината на младоста, убавината на биолошкиот момент во твојот живот. И животот продолжува. Телото старее и мораме да го прифатиме тоа. Не можеме да направиме ништо. Истовремено, ние сме среќни, бидејќи ако старееме, значи дека сме имале долг живот. Како што опаѓа телото, душата расте“ – рекла таа.
Белучи ги избегнува строгите диети и напорните тренинзи и преферира да ужива во вино и тестенини, со повремени пилатес тренинзи.
„Се разбира дека вежбам малку, малку внимавам на исхраната, но не сум опседната. Отсекогаш сум била жена со облини, никогаш не сум била слаба, таква сум по природа. И сакам да остарам на спокоен начин. Кога имаш 50 или 60 години, ги немаш истите потреби како кога си имала 20. Се менуваш, како кога твоето дете ќе влезе во собата, прво ја гледаш неа. Ти си на второ место. Тоа ни дава различна перспектива“ – рекла таа.
Во врска со движењето #MeToo, Белучи рекла:
„Изодивме долг пат и денес имаме храброст да кажуваме работи, бидејќи има жени кои го направиле тоа пред нас. Но, истовремено, не верувам во војна помеѓу мажи и жени, мислам дека треба да се најде заеднички терен за комуникација. Не сакам да ги учам моите ќерки да бидат полни со омраза, тоа не води никаде. Мораме да најдеме начин да разговараме.“
