„Ружа са југа“: Спотот на Бобан Рајовиќ за песната посветена на Македонија снимен на наши прекрасни локации
Музиката не познава граници, а кога е создадена со чиста емоција и искрена љубов, таа допира директно до срцето.
Бобан Рајовиќ својата најнова песна „Ружа са југа“ ја посвети на Македонија, земјата која, како што вели самиот, одамна ја носи во својата душа.
Зад оваа прекрасна балада се крие приказна која тлеела со години. Инспирацијата за песната потекнува уште од неговото детство во Данска, каде растел и се дружел со Македонци, од каде ја понел и фасцинацијата од нашиот менталитет, топлина и гостопримство.
„Луѓето кои никогаш не биле во Македонија мораат да дојдат овде. Во моментот кога ќе зачекорат на македонска почва ќе почувствуваат една душа, една емоција, едно гостопримство. Сето сум го почувствувал секогаш кога сум дошол овде. Имам многу македонски пријатели и долго, долго размислував за песна за Македонија или песна во која ќе се споменува Македонка. Се надевам дека луѓето низ „Ружа са југа“ ќе ја почувствуваат душата на оваа земја, мојата душа, а низ спотот ќе ги видат и преубавите предели. Едноставно морав да го направам ова затоа што долго ми лежеше на срцето“, вели Рајовиќ.
Спотот е снимен на прекрасни локации во Галичник, Охрид, Свети Николе и Кавадарци.
Главната женска улога во видеозаписот ја доби македонската манекенка Ангелина Китановска, која Рајовиќ лично ја избрал и која, како што вели, се издвоила по својата природна убавина.
