„Првиот Божиќ без тебе, Дади“: Росица Кулакова тагува по сестра ѝ Фросина која загина во сообраќајка во Скопје
Семејството и најблиските на Фросина Кулакова никогаш нема да се помират со нејзината смрт. За нив, особено се тешки празниците и важните датуми кога „налетуваат на нејзиното отсуство“.
Сестра ѝ Росица со голема тага во срцето напиша емотивен пост на првиот Божиќ без нејзината „Дади“ и сподели заедничка фотографија.
Првиот Божиќ без тебе, Дади…
Никој не знае дека и јас заминав со тебе тој проклет 29 јануари - затоа што следниот ден станав, се измив, се облеков и продолжив да живеам. Но, еден дел од мене засекогаш умре со тебе, Фроси, и тоа одекнува во секој нов ден.
Загубата не е само еден момент - туку серија од отсуства на кои постојано налетуваш, одново и одново.
Болката и тагата се вгнездуваат во сите ќошиња на душата за кои ни не си знаел дека постојат. И најобичните моменти стануваат емоционални мини.
Одболувањето нема ред, нема правила.
Болката не познава граници.
Исто како што и твојата љубов не познаваше.Се надевам дека си таму горе со ангелите - слободна, насмеана и своја.
Само еднаш во животот се среќава душа како твојата.
Бескрајно ми недостасуваш, љубов дадина. 🤍
22-годишната Фросина беше прегазена од возач под дејство на алкохол, без возачка дозвола, на пешачки премин во Скопје. Обвинетиот Васил Јованов доби казна од 13 години затвор за кривично дело „тешки дела против безбедноста на луѓето и имотот во сообраќајот“.
