Прва свадба во Нотр Дам по 30 години: Дрводелец кој помогна да се обнови изгорената катедрала прв се венча во неа

Дрводелец, кој три години помагал во реставрацијата на Нотр Дам, е првата личност која доби дозвола да се венча во неа по обновувањето. Ова е прва венчавка во катедралата по три децении.

Мартин Лоренц се ожени со својата сакана Џејд пред 500 гости, меѓу кои имало и многу дрводелци кои дошле со секири за да оддадат почит на неговата работа. Тој се заколна на вечна љубов под готските сводови во чие обновување и самиот учествувал.

Сакам да ја споделам мојата љубов со целиот свет, со сите кои имаат потреба од неа. Само сакам да кажам дека ова е најубавиот ден во мојот живот – рекол Лоренц.

За да ја реконструира средновековната дрвена конструкција, која беше зафатена од пожар во 2019 година, Мартин рачно сечел греди од даб, користејќи алатки од 13 век. Додека траела реконструкцијата, тој добил идеја да се венча со саканата токму таму. Потоа побарал дозвола од архиепископот на Париз да се венча во катедралата, кој ја одобрил неговата желба како исклучок.

Венчавките во Нотр Дам се исклучително ретки. Само архиепископот може да одобри венчавка, а такви дозволи се дадени само неколкупати во нејзината 860-годишна историја. Последната венчавка таму била во 1995 година.

Кога младенците излегле од катедралата, десетици дрводелци формирале почесна стража, издигнувајќи ги своите секири за да ги поздрават.

Реконструкцијата на Нотр Дам чинела околу 700 милиони евра, а во неа беа вклучени 2.000 работници.