Дејвид Бекам испиша историја откако официјално доби своја ѕвезда на познатата Патека на славните во Холивуд. Со ова, тој стана првиот фудбалер во историјата на кој му е доделено ова престижно признание.
51-годишниот поранешен фудбалер беше награден за неговата клучна улога во подигнувањето на популарноста на фудбалот во Америка, како и за неговото огромно и долготрајно влијание врз спортот, шоу-бизнисот и глобалната поп-култура.
На свечената церемонија во Лос Анџелес, славниот спортист гордо позираше со својата сопруга Викторија и три од нивните деца, кои дојдоа да му дадат безрезервна поддршка на својот татко. Отсутен беше најстариот син на славниот пар, Бруклин, со кого долго време не се во добри односи.
„Имав прекрасни моменти во мојата кариера, но да бидам тука во Лос Анџелес и да добијам ѕвезда на светски познатата Патека на славните е навистина неверојатно“ - изјави Бекам, упатувајќи огромна благодарност до своето „неверојатно семејство“ и „прекрасните деца“.
Викторија му честиташе на саканиот со бакнеж и на Instagram напиша:
„Кога Дејвид првпат дојде во Америка, имаше сон. Да ја сподели својата страст за фудбалот и да го претвори во еден од најголемите спортови во САД.
Денес, неговото име се приклучува на Холивудската патека на славните. Тоа е доказ не само за она што го постигна, туку и за тоа каква личност е.
Честитки Дејвид, не би можела да бидам погорда на тебе. Сите те сакаме многу!!“
Дејвид ја доби поддршката и од Том Круз и Ева Лонгорија.
