Прв ранец, големи соништа: Деца со спинална мускулна атрофија од Македонија тргнаа во прво одделение

Новата учебна година е особено специјална за Христијан, Георге и Лина кои за првпат седнаа во училишните клупи како првачиња.

Трите дечиња имаат спинална мускулна атрофија (СМА), но не дозволуваат тоа да им е пречка за учење и за стекнување нови пријателства. Тие имаат големи соништа, но и силна поддршка од семејствата, наставниците и нивните нови соученици.

Од здружението „СТОП СМА Македонија“ споделија фотографии од среќните дечиња по повод нивниот прв училиштен ден и упатија искрени желби за успешен почеток на новото поглавје во нивните животи.

Што е СМА?

Спиналната мускулна атрофија (СМА) е ретка, тешка и прогресивна генетска невромускулна болест која предизвикува слабост и атрофија на мускулите. Настанува поради дегенерација на моторните неврони, нервни клетки во 'рбетниот мозок кои ги контролираат доброволните движења на мускулите.

Важно е да се напомене дека СМА не влијае на интелектуалниот развој. Децата со оваа состојба имаат нормална, а во некои случаи и натпросечна интелигенција.