Приказната на „македонската Пепелашка“: Нермина Џафероски од трошна куќа во Велес стигна до живот од соништата во Америка
Од трошна куќичка во Велешко, каде осумчлено семејство делело две соби и еден ходник, до живот во Чикаго и кариера во светот на луксузниот ентериер – ова е неверојатната животна приказна на Нермина Џафероски.
43-годишната Македонка го поминала детството во скромни услови, а на само 14 години се соочила со разводот на родителите и со одлуката на татко ѝ дека нема да продолжи со средното образование. Наместо да се помири со тоа, Нермина заминала со мајка си во Нови Пазар, каде продолжила да се школува и паралелно работела во пекара.
На 18 години го запознала идниот сопруг, а нивната љубовна приказна набрзо ја одвела преку океанот.
„Одлучивме да се земиме... Јас избегав бегалка за него“ – раскажала таа во подкастот „Марија во Америка“.
Преселбата во Чикаго била нов почеток. Прво работела како чистачка со свекрвата, а потоа како фризерка и организаторка на приватни забави, додека го совладувала англискиот јазик и се адаптирала на новата средина.
Со текот на годините, Нермина го изградила животот за кој некогаш можеби само сонувала. Денес е успешна дизајнерка која работи со луксузни завеси и ентериери, а во текот на кариерата влегувала во домови вредни и до 20 милиони долари.
Заедно со сопругот, кого го опишува како своја најголема поддршка, имаат четири деца.
И покрај успехот и животот во Америка, таа не ги заборава своите корени и често се враќа во Македонија.
Нејзината приказна е доказ дека местото од кое започнуваме не мора да ја одреди нашата крајна дестинација и дека понекогаш најтешките почетоци се токму она што нè прави доволно силни да стигнеме далеку.
Целосната животна приказна на Нермина е раскажана во поткастот „Marija vo Amerika“: