Ѓорѓи Петрушев има нова модна колекција.
Младиот македонски дизајнер ги претстави пролетните креации од колекцијата насловена „Предвесник“ која, како што вели тој, ја раскажува приказната за преминот од зима во пролет.
„Предвесник е колекција која ја раскажува приказната за преминот од зима во пролет, за магијата која го оживува и обојува светот, момент кој ги најавува убавините кои доаѓаат“ – изјави Ѓорѓи за Femina.mk.
„Разбудувањето од ладната зима и преминот во новата сезона е прикажано преку боите инсприрани од модните илустрации на Марсел Вертес, полноќно сина која го претставува мрачниот ладен зимски период и розевата која го претставува расцутувањето на пролетта. Две контрастни бои кои заедно создаваат хармонија.“
„Колекцијата ја сочинуваат вечерни couture креации, кои се рачно изработени, везени и плисирани. Играта и изборот на ткаенини, исто така претставува контраст, како на пример свила, волнен штоф, кадифе и сатен, сите овие материјали додаваат кон карактерот на креациите. Ноќното зимско небо и неговите ѕвезди се прикажани на една од креациите, која има рачно извезен мотив од безброј монистри опкружени со мекоста на кадифето. Розевите креации имаат поголема флуидност, поради леснотијата на материјалите од кои се изработени“ – дополни Петрушев.
Моделот кој ги носи креациите е Бојана Нушкова, а за фотосесијата се погрижила Кристина Велковска.