Предупредување од доктор за родителите: Две деца во Загреб трајно ослепиле поради игра со ласер
Во пет дена, две деца на возраст од 12 и 13 години во Загреб доживеале неповратно оштетување на видот поради изложеност на силни ласерски уреди купени преку интернет. Во двата случаи е утврдено тешко оштетување на мрежницата на едното око, со траен губиток на видот.
Станувало збор за многу силни ласери кои за секунди можат да запалат чкорче и пластика. Децата цел живот ќе имаат функционален вид само на едното око затоа што медицината, за жал, не може да ја поправи штетата нанесена на мрежницата.
„Тоа се млади тинејџери кои од љубопитност го зеле ласерот кој се наоѓал во нивниот дом, а бил купен преку интернет. Ласерските зраци не болат, па детето не било свесно и поради тоа не верувало дека нешто може да се случи ако види како изгледа ласерскиот зрак“ – рекла проф. д-р Мирјана Бјелош, офталмолог од Клиничката болница „Свети Дух“.
Таа апелира до родителите и јавноста за сериозноста на ризиците поврзани со употребата на ласери. Докторката вели дека кај помалку силните ласери доволна е една секунда, а кај посилните милисекунда за трајно да се оштети видот. Оние со зелена светлина се поопасни одошто оние со црвена.
Во двата случаи ласерите биле добиени како подарок, купени преку интернет.
Доктор Бјелош советува доколку некоја ознака на производ им е сомнителна на родителите, подобро е таквата играчка да не им ја даваат на децата.
Таа нагласува дека овие повреди не се резултат на болест или генетски фактори, туку на околности кои можеле целосно да се избегнат. Таа предупредува дека детскиот вид е исклучително чувствителен, а оштетувањата настанати во детството имаат доживотни последици кои влијаат врз образованието, безбедноста и квалитетот на животот.
„Губитокот на вид кај дете не е само медицински проблем, туку длабока промена во начинот на кој тоа го доживува светот“ – истакнува таа, повикувајќи на поголема контрола, регулација и одговорност при купување и користење технолошки уреди наменети за деца.
„Сите ласери со моќност поголема од еден миливат можат, доколку се насочат директно во окото, да предизвикаат трајно оштетување на видот“ – додава Бјелош.