Пред неговата зграда во Аеродром: Мурал со ликот на Панчо претставен на неговиот роденден
Доколку беше жив, Владимир Блажев-Панчо вчера ќе го прославеше својот 47-ми роденден.
За да се одбележи овој ден, беше насликан и претставен мурал со неговиот лик пред зградата во Скопје во којашто живееше.
Фотографијата ја објавија од издавачката куќа „Sure Shotz“, чиј коосновач беше Панчо.
„Денес, на денот на роденденот на Панчо, за прв пат се прикажа мурал со неговиот лик пред зградата во која живееше. Преку маалска дружба и музика, се потсетивме на него и убавите заеднички моменти. Фала им на дечките од Аеродром за иницијативата и изработката на муралот, и се надеваме дека оваа собиранка ќе ни прерасне во традиција.
Forever P ❤️“ – стои во описот.
„Нашето маало никогаш нема да го заборави својот Панчо.
Денес, на твојот роденден, ти оддаваме почит на начин што ќе остане засекогаш – со графит, како симбол на љубовта, почитта и спомените што ги остави зад себе.
Ти беше повеќе од музичар. Беше наш сосед, наш другар, наше дете од маало.
Големо фала на дечките од Аеродром и екипата на @sureshotz_mk што помогнаа да го реализираме овој скромен но значаен спомен!
Среќен роденден, Панчо. Засекогаш еден од нас. 🕊️🤍“ - напиша Росана Миленкова Мишева, која објави фотографии од изработката на муралот.
Панчо речиси седум месеци се лекуваше во болница по трагичниот пожар во дискотеката „Пулс“ во Кочани, но за жал, почина како последица на повредите.