И Скопје се претвори во празнична бајка. Вечерва се одржа свеченото осветлување на елката на плоштадот Македонија, а беше отворен и божиќниот маркет.
Говорејќи за празничните активности, Ѓорѓиевски најави богата програма:
„Скопје за првпат нуди континуирана и разновидна празнична програма за сите наши сограѓани. Секој ден, од 12 до 14 часот, содржините се целосно посветени на нашите најмали, со анимации, креативни работилници, интерактивни активности и празнични изненадувања. Во вечерните часови, програмата е наменета за младите и за возрасните, создавајќи топла и жива празнична атмосфера. Централниот дел од новогодишната програма започнува на 27 декември, во соработка со Државна лотарија, со доаѓањето на Дедо Мраз, празнични забави и награди за сите генерации.“
За новогодишната прослава се ангажирани македонски музичари, меѓу кои Тамара Тодевска, Каролина Гочева, Миле Кузмановски, Огнен Здравковски, Лара и Пајак, Два Бона, Куку Леле и Лина Пејовска. Коментирајќи го планираниот спектакл, Ѓорѓиевски додаде:
„Ги поканувам сите граѓани, сите семејства и посетители заедно да ја започнеме новата традиција и да бидат дел од новогодишната магија, создавајќи Скопје исполнето со светлина, радост и со позитивна енергија...
Ова ќе биде голем настан, со многу големи ѕвезди кои со години наназад не сме ги имале на исто место. Јас ќе бидам тука таа вечер со сите вас и верувам дека ќе се обедини нашиот народ во Скопје, конечно, по долги години. Музиката не познава вера, ниту нација. Плоштадот Македонија ќе биде исполнет со детски џагор, детски насмевки и весели луѓе, весели скопјани, без разлика на вера и нација, кои заеднички со нас ќе го дочекаат празникот.“
