Позитивната страна на социјалните мрежи: Девојка пронајде донор на бубрег преку TikTok

Социјалните мрежи имаат и добри и лоши страни. Една позитивна случка покажа дека TikTok може да биде извор на убави приказни кои вреди да се раскажуваат.

Девојка од Оклахома случајно пронајде донор на бубрег токму преку TikTok.

Лево: Савана, Десно: Кејти

Кејти Халум, со дијагноза ИГ-А нефропатија (Бергерова болест), преку комично видео сподели дека има потреба од трансплантација на здрав бубрег од личност со нулта крвна група.

Овој видеозапис случајно пристигнал до Савана Сталбаумер, која веднаш ѝ оставила коментар на Кејти. „Каде можам да се тестирам?“ – стоело во пораката.

По неколкумесечни тестирања, се открило дека Савана е совршен донор за Кејти.

Така, добродушната девојка одлучила лично да ѝ ја соопшти оваа вест на болната девојка. Таа отишла во ресторанот кадешто била Кејти со своето семејство и носела транспарент на кој пишувало:

„ВЕСТ НА ДЕНОТ: Ќе добиеш нов бубрег“.

Савана била решена да ѝ помогне на Кејти и покрај тоа што постоела можност нејзиното тело да го отфрли донираниот бубрег по трансплантацијата. „Постоеше можност нејзиниот бубрег да умре во мене, а таа ми кажа дека ако тоа ми помогне да престанам со дијализа неколку години, дека не ѝ е гајле. Дека сака да го направи тоа“ – рекла Кејти.

„Не можев да поверувам дека некој кој едвај ме познава, сака да ми го спаси животот“ – дополнила Кејти, која ѝ напиша емотивна порака на својата хероина Савана.

„Савана, што можам да кажам? Зборовите никогаш нема да бидат доволни за да ја искажат длабочината на моите чувства за твојата жртва. Ми го спаси животот. Еднаш ми кажа дека сакаш да бидеш медицинска сестра затоа што сакаш да бидеш нечиј херој – но, можам да ти кажам дека веќе си мој херој. Премногу благодарна и почестена сум што беше подготвена да дадеш дел од себе за да ме спасиш.“

„Се сеќавам дека кога првпат влеговме во болницата заедно, прочитавме знак на кој пишуваше: ‘Низ овие врати минуваат обични луѓе кои прават извонредни работи’. Ние се насмеавме на тоа, но не можев да не помислам колку е тоа точно. Ти не си ништо помалку од извонредна. Драго ми е што Бог нè спои, бидејќи тоа што те запознав е само еден почеток на долгото патување полно со спомени споделени меѓу нас. Ти си многу повеќе од само моја пријателка и мој донор – ти си моја сестра. Те сакам, хероино моја“.

Трансплантацијата минала успешно и двете девојки излегле од операциите во добра состојба.