Почина „Жената-мачка“ позната по пластичните операции и по разводот со кој стана милијардерка

Џоселин Вилденштајн, позната и како „Жената-мачка“ поради бројните пластични операции, почина на 84 години.

Силно озборуваната Швајцарка издишала за последен пат за време на дремка во палата во Париз каде престојувала со долгогодишниот партнер Лојд Клајн.

Често беше под лупата на медиумите поради изгледот, но и поради големата парична сума која ја доби по разводот од трговецот на уметност Алек Вилденштајн.

Џоселин започнала со козметичките процедури уште додека била во брак со Алек, наводно за да ги задоволи неговите преференции. Но, продолжи да се менува надворешно и по разводот со кој стана милијардерка. Имено, контроверзната разделба по негово неверство ѝ донесе над 2 милијарди долари и исплата од по 100 милиони годишно.

Бидејќи обожавала големи мачки и самата таа чувала рис, се стремела со операциите да добие мачкести очи, а оттаму доаѓа и прекарот „Жена-мачка“. „Рисот има совршени очи“ - рекла таа.

Џоселин и Алек Вилденштајн имаат две деца.

Бидејќи исплатите неколку години по разводот прекинале, Џоселин банкротирала.

Пред смртта, долги години беше со дизајнерот Лојд Клајн, а нивната љубов во неколку наврати беше засенета од пријави за насилство.