Почина Вивиен Вествуд. Модната дизајнерка, која неретко беше нарекувана „кралица на британската мода“, издиша за последен пат на 81-годишна возраст.
Тажната вест беше објавена од нејзината модна куќа. Во соопштението пишува:
„Вивиен Вествуд почина мирно денес, опкружена од нејзиното семејство во Клапам, Јужен Лондон. Вивиен до последниот момент продолжи да ги прави нештата кои ги сакаше. Таа дизајнираше, работеше на нејзината уметност, ја пишуваше својата книга и го менуваше светот кон подобро. Таа водеше неверојатен живот. Нејзината иновативност и влијание во изминатите 60 години се огромни и ќе продолжат во иднина.“
Нејзиниот сопруг Андреас Кронталер изјавил: „Ќе продолжам со Вивиен во моето срце. Работевме до самиот крај и таа ми даде многу нешта за да продолжам. Фала ти драга.“
Вивиен доби орден од Кралицата Елизабета II во 1992 година. По одликувањето, таа позираше пред фотографите веејќи го своето здолниште за да покаже дека не носи долна облека.
Нејзиниот бунтовнички дух се рефлектираше во нејзините креации и стана основа на панк стилот. Таа се прослави во 70-тите години од минатиот век и имаше можност да облекува бројни славни личности низ годините.
